Ҳаддан ташқари кўп ишлаш мияда жиддий ўзгаришларни келтириб чиқаради
Ортиқча ишлаш ҳар йили 745 мингдан ортиқ ўлим ҳолатига олиб келади.
Жанубий Кореяда олиб борилган илмий тадқиқотлар ҳаддан ташқари ишлаш нафақат руҳий чарчоқ ва соғлиқ муаммоларига, балки мияда жиддий тузилмавий ўзгаришларга олиб келишини кўрсатди.
Ёнсеи университети олимлари Кореянинг юқори иш босими остидаги ходимлари устида тадқиқот олиб борди. Унга кўра, ҳафтасига 52 ёки ундан кўпроқ соат ишлайдиган 32 нафар ходимнинг мияси нейроимагинг технологияси ёрдамида ўрганилган. Натижаларга кўра, уларнинг мия тузилмаси стандарт иш соатларида ишлайдиганларга нисбатан сезиларли даражада фарқланган.
Тадқиқот муаллифи, доцент Чой Жун-юлнинг таъкидлашича, стресс омиллари бартараф этилса, мия тузилмасидаги ўзгаришлар қисман тикланиши мумкин. Бироқ бу узоқ вақт талаб қилади, ҳатто баъзида нафақага чиқиш каби кескин чоралар зарур бўлади.
2021 йилда Халқаро меҳнат ташкилоти (ХМТ) ва Жаҳон соғлиқни сақлаш ташкилоти (ЖССТ) томонидан ўтказилган қўшма тадқиқотга кўра, ортиқча ишлаш ҳар йили 745 мингдан ортиқ ўлим ҳолатига олиб келади. Узоқ иш вақти, айниқса, аёлларда диабет ва ақлий саломатликда пасайиш хавфини оширади.
