“Ўзингизни ҳурмат қилинг, ўзгаларга эҳтиром кўрсатинг”

“Касалхона деворлари черков деворларига қараганда кўпроқ самимий дуоларни эшитган... Айнан касалхонада ўзига тўқ врач қашшоқ бир кимсанинг ҳаётини сақлаб қолганлигини кўриш мумкин. Реанимацияда яҳудий шифокор яҳудийлар душманига ғамхўрлик кўрсатаётганлигига гувоҳ бўлиш мумкин. Полициячи ва маҳбус бир палатада ётиб, бир хил ёрдам олади. Жигар кўчириб ўтказишни кутиб ётган бой-бадавлат инсон камбағал бир донорнинг жигарини қабул қилишга шай бўлиб туради. Илоҳий донишмандлик бошига иш тушган турли ижтимоий муҳитга мансуб одамлар тақдирини касалхонада ўзаро кесиштиради.

 

Тақдирнинг одамларни бундай юзма-юз келтиришида ёлғиз ўзимиз ҳеч нарсага ярамаслигимизни тушуниб етамиз. Касалхона – бу одамлар юзларидан ниқобни ечиб, қандай бўлсалар шундайликларича ўзларининг асил башараларини намойиш қиладиган жой.

 

 

 

 

Бу ҳаёт тез ўтиб кетади, шу боис уни одамлар билан курашишга сарфламанг. Ўз вужудингизга ҳадеб танқидий кўз билан қарайверманг. Ҳаддан зиёд нолийверманг. Пулларингиз сақланаётган банк ҳисоб рақамларини ўйлайвериб уйқунгиз қочмасин. Яқинларингизни албатта қучиб, ўпиб қўйинг. Уйингиз бекам-кўст, саранжом-саришта бўлишини ўйлаб ҳадеб сиқилаверманг. Моддий бойликлар ҳар бир инсоннинг ўзи томонидан ҳалол меҳнат билан ишлаб топилиши керак – мерос йиғиш ва қолдиришга муккангиздан кетманг. Сиз жуда кўп нарсани кутасиз ва орзу қиласиз: байрамларни, жума кунини, янги йилни, ҳамёнингизда пул бўлишини, ҳаётингизга муҳаббат кириб келишини, қачон ҳамма нарса мукаммал (идеал) бўлишини... Яхшилаб қулоғингизга қуйиб олинг: бу дунёда мукаммаллик йўқ! Инсон мукаммалликка эриша олмайди, чунки одамзод мукаммал яратилмаган. Бизга фақат ҳаётдан таълим олиш имконияти берилган.

 

Ўзингизни ҳурмат қилинг, ўзгаларга эҳтиром кўрсатинг. Тақдир пешонангизга ёзган йўлдан юринг, бошқалар сиз учун танлаган йўлга қадам босманг. Танбеҳ берманг, ҳукм чиқарманг, бировнинг ишига аралашманг – одамларни ҳурмат қилинг. Одамларни кўпроқ яхши кўринг, кўпроқ кечиринг, уларни кўпроқ бағрингизга босинг – бадастир ҳаёт кечиринг!

 

Қолган барчаси эса Яратган Эгамнинг қўлида”, деб ёзган Папа Франсиск.

 

                                                                                                                             Жалолиддин Сафоев таржимаси