Россияда Википедия блокланиши мумкин
Платформадаги маълумотлар русларга қарши руҳда экани айтилмоқда.
Россия Давлат Думаси депутатлари Википедия онлайн энциклопедиясини мамлакат ҳудудида блоклаш таклифи билан чиқишди. Уларнинг фикрича, платформада тарқатилаётган маълумотлар русларга қарши руҳда бўлиб, тарихий воқеалар бирёқлама ва нотўғри ёритилмоқда.
Депутатлар Википедияни "ғарблик мафкуравий восита" деб атаб, уни Россия ахборот хавфсизлигига таҳдид деб ҳисобламоқда. Шу сабабли улар расмий равишда ресурсни чеклаш чораларини кўришга чақирмоқда.
Ҳозирча Википедия Россияда тўлиқ блокланмаган, аммо айрим саҳифалар аллақачон чекловларга учраган. Масала бўйича расмий қарор ҳали эълон қилинмаган.
