"Дурдона" фольклор ансамбли: миллий маданиятимизга садоқатнинг 20 йиллик тарихий йўли

2025 йил 20 май куни Учтепа туман Маданият марказида "Дурдона" фольклор ансамблининг ташкил топганига 20 йил тўлиши муносабати билан тантанали юбилей байрами бўлиб ўтди.

 

Тадбирда тумандаги маданият ва санъат соҳасида фаолият юритаётган ижодкорлар, жамоатчилик вакиллари, фахрий устозлар ҳамда ёшлар иштирок этдилар. Байрамона кечада "Дурдона" ансамбли томонидан тайёрланган миллий куй-қўшиқлар, анъанавий рақслар, саҳна кўринишлари томошабинлар олқишига сазовор бўлди. Миллий либослар, доира садоси ва замонавий саҳналаштириш орқали ансамбль аъзолари ўзбек халқининг бой маданий меросини яна бир бор ёрқин тарзда намойиш этдилар.

 

Тадбир давомида катта экранда ансамблнинг ўтган йиллардаги фаолиятини акс эттирувчи фотолавҳалар намойиш этилди. Бу орқали томошабинлар ансамблнинг босиб ўтган йўли, ютуқлари ва саҳнадаги унутилмас лаҳзалар билан яқиндан танишиш имконига эга бўлдилар.

 

Тантанали кечада сўзга чиққанлар "Дурдона" ансамблининг туман маданий ҳаётида тутган ўрнини алоҳида эътироф этиб, уларнинг ёшларга берган тарбиявий таъсири, халқ оғзаки ижодиёти ва анъаналарини асраб-авайлаш борасидаги хизматларини юқори баҳоладилар.

 

Эслатиб ўтамиз, "Дурдона" фольклор ансамбли 2004 йилда ташкил этилган бўлиб, шу кунгача ўнлаб маҳаллий ва республика миқёсидаги тадбирларда иштирок этиб келмоқда. Ансамбль фаолияти миллий маданиятни асраш, халқ оғзаки ижоди ва қадимий куй-қўшиқларни ёш авлодга етказиш каби эзгу мақсадларга хизмат қилиб келмоқда.