Тошкентда метро ҳайдовчиси ҳомиладор рафиқасини ўлдирди

Тошкент метрополитени машинисти бўлиб ишлаган 28 ёшли эркак ўз ҳомиладор рафиқасини пичоқлаб ўлдиргани учун судланган. Жиноят 2023 йил декабрь ойида содир бўлган бўлиб, у жасадни Салар каналига ташлаб, воқеа жойидан қочиб кетган.

 

Суд ҳужжатларига кўра, аёл оилавий келишмовчиликлар сабаб ота-онасининг уйига кўчиб ўтган. Эркак уни ишдан олиб кетиш баҳонаси билан машинага ўтқазган ва йўлда жанжал вақтида ошхона пичоғи билан кўкрагига урган. Аёл воқеа жойида вафот этган. Марҳума тиббиёт муассасасида ишлаган ва ҳомиладор бўлган.

 

Судда айбланувчи қилган жиноятини тан олиб, севиб турмуш қурганини, лекин сўнгги вақтларда келишмовчиликлар кучайганини, ва пушаймонлигини айтган. Марҳуманинг яқинлари эса эркак нафақат аёлни, балки туғилмаган фарзандини ҳам ўлдирганини таъкидлаб, энг оғир жазо — умрбод қамоқ талаб қилишди.

 

Суд ҳукмига кўра, D.N. Ўзбекистон Жиноят кодексининг 97-моддаси 2-қисми «б» банди — ҳомиладор аёлни атайин ўлдириш бўйича айбдор деб топилиб, унга 18 йил озодликдан маҳрум қилиш жазоси белгиланди.