ЕИ Украина экспортига бож тўловларини тиклайди
Ҳозирда савдо келишуви бўйича музокаралар давом этмоқда.
Европа Иттифоқи (ЕИ) 2022 йилда Россиянинг Украинага бостириб киришидан сўнг Украина экспортига бож ва квоталарни вақтинча бекор қилган эди. Бу чоралар 2024 йил 6 июнь куни яна бир йилга узайтирилди ва 2025 йил 5 июнгача амал қилади.
Бироқ, ЕИ ички бозорини ҳимоя қилиш мақсадида айрим қишлоқ хўжалиги маҳсулотлари, жумладан, тухум, шакар, маккажўхори, асал ва парранда гўшти учун автоматик чеклов механизми жорий этилди. Агар бу маҳсулотлар импорти 2022–2023 йиллардаги ўртача ҳажмдан ошса, божлар қайта тикланади.
Украина Молия вазири Серҳий Марченко бу чекловлар мамлакат иқтисодиётига жиддий зарар етказишини айтиб, ЕИ томонидан божларнинг қайта жорий этилиши салбий сигнал бўлишини таъкидлади.
Айни пайтда ЕИ ва Украина ўртасида узоқ муддатли савдо келишуви бўйича музокаралар давом этмоқда. Агар янги келишувга эришилмаса, 2025 йил 6 июндан бошлаб 2014 йилдаги Ассоциация битими шартларига қайтилиши мумкин.
