Таиландда мушук ҳибсга олинди
У полицияга ҳужум қилган.
Таиландда йўқолиб қолган америкалик шортҳаир мушук топилиб, полиция бўлимига олиб келинганидан сўнг, у ерда бир нечта офицерларга тирноқ ва тишлари билан ҳужум қилган. Натижада, мушук ҳибсга олиниб, ҳаттоки унга «мугшот» — жиноятчилар сингари сурат ҳам олинган.
Полициячи Паринда Пакеэсук мушукни станцияга олиб келган фуқародан қабул қилиб олиб, унга овқат, қумли қути ва ўйинчоқлар тайёрлаган. Бироқ, “Нуб Танг” лақабли бу шўх мушук хизматдаги ходимларга ўз феъл-атвори билан ташвиш келтирган. Шунга қарамай, Пакеэсук бу ҳолатни ҳазил билан қабул қилиб, мушукни уйига олиб кетган.
Орадан бир кун ўтиб, мушукнинг эгаси полицияга мурожаат қилган. У мушукни байрамона кайфиятда қайтариб олган. Пакеэсук ҳазиломуз протокол ёзиб, мушукни огоҳлантирган. Шу тарзда, мушук озод қилинди ва воқеа ижтимоий тармоқларда миллионлаб фойдаланувчиларнинг меҳрини қозонди.
