Telegram энг кўп қайси давлатларда машҳур?

Буюк Британиянинг SOAX компанияси Telegram фойдаланувчилари бўйича олиб борган сўров натижаларини эълон қилди. Тадқиқотда 50 мингдан ортиқ фойдаланувчи иштирок этган бўлиб, унда мессенжернинг машҳурлиги, энг фаол мамлакатлар ва оммабоп каналлар ҳақида маълумотлар келтирилган.

 

2023 йил июль ойига келиб, Telegram 800 миллион ойлик фаол фойдаланувчига эга бўлган. Бу бир йил олдинги ҳолатга нисбатан 14,29 фоиз ўсишни билдиради. Фойдаланувчиларнинг 57,5 фоизи эркаклар, 42,4 фоизи эса аёллар. Премиум обуначилар сони эса 5 миллионга етган.

 

Telegramдан энг кўп фойдаланадиган давлат Ҳиндистон бўлиб, у ерда илова 104 миллион марта юклаб олинган. Кейинги ўринларда Россия (34,4 млн), Индонезия (27,2 млн), АҚШ (26,9 млн) ва Миср (14,9 млн) жой олган. Шунингдек, Ветнам, Мексика, Украина, Туркия, Филиппин, Нигерия, Қозоғистон ва Франция ҳам энг фаол фойдаланувчиларга эга давлатлар сафидан ўрин олган.

 

Канал тоифалари бўйича эса, фойдаланувчиларнинг 85 фоизи янгилик каналларини, 62 фоизи кўнгилочар контентни, 58 фоизи эса таълимга оид саҳифаларни кузатади. Сиёсий мавзудаги каналлар 50 фоиз, технология, молия каби соҳага оид контент эса 48 фоиз аудиторияга эга.