Эрон илк ҳаво таксисини ишга туширди

Эрон ўз тарихида илк бор ҳаво таксиси хизматини расман ишга туширди. Бу лойиҳа мамлакат авиация саноати ва транспорт инфратузилмасини ривожлантириш йўлида муҳим стратегик қадамлардан бири сифатида баҳоланмоқда.

 

Янги хизматнинг тантанали тақдимоти Ҳорремшеҳр шаҳрининг Эрон-Ироқ уруши давридаги озодлик йиллигига бағишланган тадбирлар доирасида бўлиб ўтди. Эрон президенти ҳам видеомурожаат орқали ушбу ташаббуснинг давлат миқёсидаги аҳамиятини алоҳида таъкидлади.

 

Илк ҳаво таксиси мамлакатнинг шимоли-ғарбида жойлашган Керез ва Қазвин шаҳарларини боғлайди. Лойиҳа алоқа ва ахборот технологиялари вазирлиги бошчилигида амалга оширилган бўлиб, Паям халқаро аэропорти ва Паям махсус иқтисодий зонаси томонидан қўллаб-қувватланган.

 

Паям аэропорти бош директори Моҳсен Ҳасанлу ушбу хизматни “транспортда янги босқич” деб атаб, бу ташаббус минтақавий авиацияни жонлантириш, янги инвестицияларни жалб қилиш ва аҳоли учун янада қулай ҳаво йўлларини яратиш йўлида муҳим ютуқ эканини айтди.

 

“Ҳаво таксиси юкламаси кам бўлган ҳаво йўналишларини фаоллаштириб, янги транспорт экотизимини шакллантиради. Бу эса иқтисодиётни диверсификация қилиш ва Алборз вилоятини жадал ривожлантиришга хизмат қилади”, — деди Ҳасанлу.

 

Лойиҳа Эрон транспорт тизимини замонавийлаштириш ва инновацион ечимлар орқали иқтисодий ўсишга туртки бериш режасининг бир қисмидир.