Исроил Эронни 7 соат ичида нишонга олиши мумкин

The New York Times нашрининг ёзишича, АҚШ разведкаси Исроил Эрон ядровий иншоотларига атиги етти соат ичида ҳужум уюштиришга тайёрланиши мумкинлигини аниқлаган. Ушбу хулоса АҚШ президенти Доналд Трампнинг Яқин Шарққа бўлажак сафари олдидан билдирилган хавотирлар фонида эълон қилинди.

 

Манбаларга кўра, Исроил расмийлари Вашингтонни Эрон томонидан уранни бойитиш ишлари тўхтатилмаган тақдирда, ҳарбий чоралар кўрилиши мумкинлигидан огоҳлантирган. Улар Теҳроннинг барча ядровий иншоотлари бутунлай демонтаж қилиниши тарафдори бўлиб қолмоқда.

 

Исроил ҳукумати, хусусан, Трамп маъмуриятининг Эрон ядровий дастури бўйича келишувга эришиш йўлида Теҳронга муроса таклиф этишидан хавотирда. Бу борада The New York Times Исроилнинг эҳтимолий ҳарбий ҳаракатлари дипломатик музокараларга босим сифатида ҳам кўрилаётганини таъкидлайди.

 

Бироқ, бошқа манбалар янада эҳтиёткорона ёндашув тарафдори. Axios портали маълумотларига кўра, Трамп Исроил Бош вазири Бинямин Нетаняхуга Эрон билан олиб борилаётган музокараларга халақит берувчи ҳар қандай ҳаракатдан тийилишни маслаҳат берган.

 

Шу билан бирга, 23 май куни Рим шаҳрида Эрон ва АҚШ вакиллари ўртасида ядровий дастур юзасидан бешинчи раунд музокаралари бўлиб ўтди. Уммон давлатининг воситачилигида ташкил этилган учрашув якунида, Уммон ташқи ишлар вазири Бадр ал-Бусайдий "аниқ натижа бўлмасада, ижобий силжишлар бор"лигини қайд этди. Эронлик бош музокарачи Аббос Арагчи эса, яқин бир-икки учрашув ичида муҳим келишувга эришилиши мумкин, деган умид билдирди.