Тошкент вилоятида 5,3 миллиард сўмлик ноқонуний дорилар тўхтатиб қолинди
Дорилар мамлакатга кийимлар орасига яширилган ҳолда олиб кирилган.
Тошкент вилоятида Россия ва Қозоғистондан ноқонуний олиб келинган умумий қиймати 5 миллиард 353 миллион сўм бўлган дорилар ушлаб қолинди. Бу ҳақда Давлат хавфсизлик хизмати ва Божхона қўмитаси хабар берди.
Маълум қилинишича, "Яллама" чегара-божхона постига “қизил йўлак” орқали кирган икки "Газел" русумли юк машинаси божхона назоратига юборилган. Бироқ, божхона ходими машиналарни белгиланган манзилга кузатмасдан, уларни эркин ҳаракатланишига йўл қўйган. Ҳайдовчилар эса йўналишни ўзгартириб, Юкори Чирчиқ туманидаги хонадонга бориб, машинада божхона муҳри бузилмаган ҳолда 52 мингдан ортиқ дориларни тушириб кетган. Ушбу дорилар орасида "Актовегин", "Клексан", "Ремаксол" каби 214 турдаги маҳсулотлар бор эди.
Аниқланишича, бу дорилар мамлакатга китоб ва кийим-кечаклар орасига яширилган ҳолда олиб кирилган. Дори воситалари сифати кафолатланмаган. Ҳозирда ҳайдовчилар, хонадон эгаси ва бошқа гумондорлар устидан ЖКнинг 182-моддаси 2-қисми "а" банди асосида жиноят иши очилган. Божхона ходимининг ҳаракатларига ҳам ҳуқуқий баҳо берилади.
