Араб давлатлари Эронга зарба берилишига қарши
Улар Трампни янги ядровий битим тузишга чақирган.
Қатар, Бирлашган Араб Амирликлари ва Саудия Арабистони раҳбарлари Эрон ядровий иншоотларига ҳарбий зарба берилишига қарши эканликларини маълум қилди.
Маълумотларга кўра, Қатар амири Шайх Тамим бин Ҳамад Ол Саний, БАА президенти Шайх Муҳаммад бин Зоид Ол Наҳён ва Саудия Арабистони валиаҳд шаҳзодаси Муҳаммад бин Салмон Ол Сауд АҚШ президенти Доналд Трамп билан учрашувда Эрон билан ядровий можаро масаласини муҳокама қилган.
Улар Исроил ёки АҚШ томонидан Эрон ядровий объектларига эҳтимолий зарба берилишига кескин қарши эканликларини билдирган ва Трампни янги ядровий битим тузишга чақирган. Араб етакчилари, агар зарба берилса, ўз ҳудудларида жойлашган АҚШ ҳарбий базалари туфайли уларнинг мамлакатлари Эроннинг қасос ҳужумларига нишон бўлишидан хавотир билдирган.
Аҳиос манбасига кўра, Қатар амири Доналд Трампга бундай ҳаракатлар Форс кўрфази давлатлари учун оғир оқибатларга олиб келишини айтган. Шунингдек, Саудия Арабистони ва Қатар расмийлари ҳам Исроилнинг Эрон устига зарба бериши эҳтимоли борлигидан хавотирда эканликларини таъкидлаган.
