Блогерларнинг жанжали судда кўриб чиқиладиган бўлди
Ҳозирда жанжал сабаб лойиҳа вақтинчалик тўхтатилган.
Ижтимоий тармоқларда Тошкентдаги футбол майдонида ҳаваскор ўйинчилар ўзаро жанжаллашганлиги акс этган видео тарқалиб, турли муҳокамаларга сабаб бўлмоқда. Мазкур ҳолат юзасидан шаҳар ИИББ расмий муносабат билдирди.
Қайд этилишича, 28 май куни соат 21.00 ларда Шайхонтоҳур тумани Жар ўйингоҳида LikeCup лойиҳаси доирасида санъаткорлар ва блогерлар ўртасида футбол бўйича ўртоқлик учрашуви бўлиб ўтган. Ўйин якунланганидан сўнг, 2004 йилда туғилган O.Ў. ижтимоий тармоқларда обуначиларини кўпайтириш ва ушбу ўйинга омманинг эътиборни янада кўпроқ жалб қилиш (пиар) мақсадида гўёки жамоалар ўртасида жанжал келиб чиққанлигини саҳналаштиришган.
Мазкур ҳолат юзасидан Шайхонтоҳур тумани ИИО ФМБ томонидан текширув ўтказилиб, турнир иштирокчилари билан профилактик суҳбат ўтказилган. LikeCup лойиҳаси доирасида юз берган юқоридаги ҳолат жамоатчилик ўртасида кескин эътирозлар келтириб чиққанлиги ва ҳуқуқбузарлик содир этилишига сабаб бўлганлиги учун лойиҳа вақтинча тўхтатилган.
Ҳозирда мазкур ҳолат юзасидан лойиҳа ташкилотчилари, ушбу жанжални саҳналаштирганлар ва унда иштирок этганларнинг барчасининг шахси аниқланиб, уларга нисбатан Маъмурий жавобгарлик тўғрисидаги кодекснинг тегишли моддалари билан маъмурий баённома расмийлаштирилиб, тўпланган ҳужжатлар қонуний чора кўришлик учун жиноят ишлари бўйича Шайхонтоҳур тумани судига юборилган.
