Мустақилликка бағишланган қўшиқлар танлови эълон қилинди
Ижодий ишлар жорий йилнинг 1 августгача қабул қилинади.
Ўзбекистон Республикаси Маданият вазирлиги ва "Ўзбекконсерт" давлат муассасаси юртимиз мустақиллигининг 34 йиллиги муносабати билан хонанда, шоир ва бастакорлар ўртасида қўшиқлар танловини эълон қилди.
Танловга Ватан, истиқлол, тинчлик, она юртга муҳаббат ва миллатлараро дўстлик каби мавзуларда яратилган янги қўшиқлар қабул қилинади. Асарлар 2025 йил 1 августгача "Мустақиллик-2025" Телеграм манзилига юборилиши лозим.
Ғолиблар 15 август куни эълон қилинади. 1-ўрин учун 50 млн, 2-ўрин учун 40 млн, 3-ўрин учун эса 30 млн сўм пул мукофоти белгиланган. Танловда муваффақият қозонганлар мустақиллик байрами асосий тадбирида иштирок этиш ҳуқуқига эга бўладилар.
