Германия НАТОни Россия таҳдидига тайёргарликка чақирди
НАТО 2029 йилгача урушга тайёрланиши керак.
Германия Қуролли кучлари бош инспектори Карстен Броер НАТО давлатларини 2029 йилгача Россия билан эҳтимолий қуролли тўқнашувга жиддий тайёргарлик кўришга чақирди.
Генерал Броернинг айтишича, Россия 2024 йилда 4 миллион дона 152 мм артиллерия снаряди ишлаб чиқарган. Уларнинг барчаси ҳозирча Украина урушида ишлатилмаяпти, бу эса Россиянинг кенгроқ ҳарбий режаларини кўрсатади.
Шунингдек, Россия ҳар йили 1500 дона асосий жанговар танк ишлаб чиқараётгани таъкидланди. Броер бу техникалар эҳтимолий равишда Болтиқбўйи НАТО давлатларига қарши қўлланилиши мумкинлигини истисно қилмайди: “Ҳар бир танкни Украинага юборишмайди. Улар Россия омборларида, Ғарбга қарши янги ҳарбий тузилмалар таркибида сақланади”, — деди у.
Унинг сўзларига кўра, НАТО сўнгги 40 йил ичида кузатилмаган даражадаги ҳарбий таҳдид билан юзма-юз турибди ва бу хавфга қарши ҳаракат қилиш кечиктириб бўлмайдиган масалага айланган.
Бу баёнот Европада ҳарбий хавфсизлик бўйича ташвишларнинг ошиб бораётганини кўрсатади. Германия расмийлари ушбу огоҳлантириш орқали Европа Иттифоқи ва НАТО ичида ҳарбий бюджетларни кўпайтириш ва мудофаа стратегияларини янгилаш заруриятига урғу бермоқда. Россиянинг узоқ муддатли ҳарбий салоҳияти эса ҳозирча фақат Украинага қаратилган эмас, балки кенгроқ стратегик мақсадларга хизмат қилаётгандек кўринмоқда.
