Ўзбекистон ва Буюк Британия ЖСТ музокараларини якунлади
Бу ҳақда президентнинг ЖСТ бўйича махсус вакили маълум қилди.
Ўзбекистон Жаҳон савдо ташкилотига (ЖСТ) аъзо бўлиш жараёни доирасида Буюк Британия билан икки томонлама музокараларни якунлади. Бу ҳақда президентнинг ЖСТ бўйича махсус вакили Азизбек Урунов маълум қилди. Музокаралар Лондонда ўтган ой охирида бўлиб ўтган.
Уруновнинг айтишича, икки томон барча ички тартиб-қоидалардан муваффақиятли ўтган. Энди томонлар 2025 йил 12 июнь куни Женевада бўлиб ўтадиган ЖСТ ишчи гуруҳи йиғилиши доирасида тегишли баённомани имзолашга тайёрланмоқда.
Шу тариқа Буюк Британия Ўзбекистон билан умумий бозорга кириш бўйича музокараларни якунлаган 24-давлат бўлди. Бу ЖСТга аъзо бўлиш йўлидаги муҳим қадам сифатида эътироф этилмоқда.
