Украина Россия аэродромларига оммавий ҳужум уюштирди
Россияга умумий 7 миллиард долларлик зарар етказилган.
Украина Хавфсизлик хизмати (SBU) манбаларига кўра, якшанба куни Украина томонидан Россиянинг бир нечта ҳарбий авиабазаларига кенг кўламли дрон ҳужумлари уюштирилди. Номаълум манба ҳужум натижасида Россиянинг камида 40 та ҳарбий самолёти, жумладан А-50, Tu-95 ва Tu-22М3 русумидаги самолётларга зарар етганини билдирган. Ҳозирча бу маълумотлар мустақил манбалар томонидан тасдиқланмаган.
СБУ ҳужумни “Ўргимчак тўри” деб номланган махсус операция доирасида амалга оширган бўлиб, унга хизмат раҳбари Василий Малюк бошчилик қилгани айтилмоқда.
Ҳужум қилинган аэродромлар:
Дягилево (Рязан вилояти)
Оленя (Мурманск вилояти)
Белая (Иркутск вилояти)
Иваново (Иваново вилояти)
ОАВда тарқалган видеоларга кўра, дронлар Оленегорск яқинидаги юк машинасидан учирилган. База Телеграм-каналининг ёзишича, ушбу юк машинаси ҳайдовчиси воқеа жойида ўлик ҳолда топилган.
СБУ маълумотларига кўра, ушбу ҳужумлар натижасида Россиянинг стратегик қанотли ракета ташувчи самолётларининг 34 фоизига зарар етказилган. Москвага етказилган зарарнинг умумий баҳоси 7 миллиард долларни ташкил қилиши мумкин.
Россия Мудофаа вазирлиги Украина томонидан уюштирилган ҳужумда бир нечта самолёт ёнганини тасдиқлади, бироқ зарарнинг тўлиқ ҳажмини очиқламади.
Украина Хавфсизлик хизмати “Ўргимчак тўри” операцияси ҳақида батафсил маълумотни кейинроқ эълон қилишини билдирди.
