АҚШ Сурияда учта ҳарбий базани тарк этди
Пентагон Суриядаги ҳарбий иштирокини қисқартирмоқда.
АҚШ Суриядаги ҳарбий иштирокини қисқартириш доирасида мамлакатдаги учта ҳарбий базасини тарк этди. Улардан иккитаси бутунлай ёпилган бўлса, яна бири курдларнинг “Сурия демократик кучлари” (СДК) ихтиёрига топширилди. Бу ҳақда Пентагон вакиллари хабар берди.
Сўнгги ҳафталарда АҚШ қўмондонлиги Сурия ҳудудидан тахминан 500 нафар ҳарбийсини олиб чиқиб кетган. Маълумотларга кўра, СДК кучлари “Миссияни қўллаб-қувватлаш майдони Фурот” номли ҳарбий базанинг назоратини ўз қўлига олган.
Эслатиб ўтамиз, 2015–2018 йилларда АҚШ Сурия шимолидаги курдлар назоратидаги ҳудудларда тўққизта ҳарбий база ва учта форпост ташкил этган эди.
