Ўзбекистонда Ўрмон агентлиги ташкил этилди
2025 йил 1 ноябрдан ўрмон ер майдонлари муҳофаза этилади.
Ўзбекистон Республикаси Президентининг 2025 йил 30 майдаги ПФ-90-сон фармонига биноан, Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Ўрмон хўжалиги агентлиги негизида Ўрмон ва яшил ҳудудларни кўпайтириш, чўлланишга қарши курашиш агентлиги (кейинги ўринларда — Ўрмон агентлиги) ташкил этилди.
Фармонга мувофиқ янги ташкил этилган Ўрмон агентлиги қуйидаги вазифаларни бажаради:
Республикадаги барча ўрмонларнинг давлат ҳисобини юритади ҳамда давлат ўрмон кадастрини тузади;
“Яшил макон” умуммиллий лойиҳасини амалга оширади;
Кўчатчиликни ривожлантириш ва дарахт ҳамда бута кўчатлари питомникларини кўпайтириш бўйича ижро этувчи ҳокимият органи ҳисобланади.
Шунингдек, фармонга мувофиқ 2025 йил 1 ноябрдан бошлаб ўрмон фонди ер майдонлари алоҳида муҳофаза этиладиган ҳудудлар сифатида белгиланади. Эндиликда уларнинг тоифасини ўзгартириш фақат Ўзбекистон Республикаси Президентининг қарори асосида амалга оширилади.
Мазкур ислоҳотлар мамлакатда экологик мувозанатни таъминлаш, чўлланишга қарши курашиш ва яшил ҳудудларни кенгайтириш борасидаги ишларни тизимли ва самарали ташкил этишга хизмат қилади.
