АҚШ электромобил саноати магнит тақчиллигига дуч келмоқда

 

АҚШнинг етакчи автомобиль ишлаб чиқарувчилари ва уларнинг етказиб берувчилари Хитой томонидан ноёб ер металлари (РЗМ) экспортига қўйилган чекловлар туфайли баъзи ишлаб чиқариш жараёнларини Хитойга кўчиришни кўриб чиқмоқда.

 

Манбаларга кўра, АҚШ компаниялари РЗМ тақчиллиги сабабли яқин ҳафталарда айрим автомобиль моделларининг ишлаб чиқарилишини тўхтатишга мажбур бўлишидан хавотирда. Мавжуд чекловлардан четлаб ўтиш мақсадида улар электр моторларини Хитойдаги заводларда йиғишни бошлаши ёки Хитойда тайёрланадиган ноёб ер қотишмали магнитлар билан тўлдириш учун моторларни Хитойга юбориши мумкин.

 

Айни пайтда чекловлар тайёр эҳтиёт қисмлар эмас, балки магнит материалларига нисбатан жорий этилган. Бу эса ишлаб чиқарувчиларга технологик ечимлар орқали муқобил йўлларни излашга мажбур қилмоқда.

 

Маълум қилинишича, дунёда ишлатиладиган ноёб ер металлари захирасининг 90 фоизидан ортиғи Хитойга тўғри келади. Бу магнитлар юқори ҳароратда барқарор ишлаши билан ажралиб туради ва смартфонлар, F-35 қирувчи самолётлари ҳамда электромобиллар ишлаб чиқаришда муҳим роль ўйнайди. Айнан ушбу магнитлар электр моторларга юқори тезлик ва самарадорликни таъминлайди.

 

14 апрель куни Хитой ҳукумати АҚШ билан давом этаётган савдо келишмовчилиги фонида баъзи РЗМ ва магнитлар экспортини тўхтатиш бўйича қарор чиқарган эди. Бу эса глобал автомобилсозлик, яримўтказгич ва аэрокосмик саноатга салбий таъсир кўрсатмоқда. Хитой ҳозирда ушбу экспорт жараёнларини янги тартибга солиш тизими асосида қайта ташкил этмоқда.