Японияда эскалаторда сайр қилганларга пул тўланмоқда

Япониянинг Наоя шаҳри жамоат транспортида хавфсизликни ошириш мақсадида янги тартибни жорий этди. Эскалаторларда ҳаракатланмасдан тинч туришни тарғиб қилаётган фуқароларга пул тўланмоқда.

 

Янги ташаббусга кўра, эскалаторларнинг ҳар икки томонини банд қилиб, ҳаракатланмасдан туришни тарғиб қилувчи кўнгиллилар гуруҳлари тузилган. Гуруҳ аъзолари 19 та темирйўл станциясида кунига 6 соат хизмат қилади. Улар қўлларида тинч туришга чақирувчи ёзувлар тутиб туришади.

 

Бу иш учун гуруҳ раҳбарига кунига тахминан 110 доллар, қолган аъзоларга эса 45 долларгача ҳақ тўланади. Ташкилотчиларга кўра, бу айниқса талабалар ва нафақадаги фуқаролар учун яхши даромад манбаига айланиши мумкин.

 

Маҳаллий ҳокимият вакиллари бундай чора эскалаторларда юз берадиган бахтсиз ҳодисаларни камайтиради, айниқса болалар ва кексаларни ҳимоя қилишга хизмат қилади, деб ҳисобламоқда.

 

Бироқ янги тартибни танқид қилаётганлар ҳам бор — уларнинг фикрича, бу эскалаторларда шошаётган фуқаролар учун ноқулайлик туғдиради ва кутиш вақтини узайтиради. Тадқиқотлар эса эскалаторларда ҳаракатни тўғри бошқариш асосан станциянинг бандлик даражасига боғлиқлигини кўрсатган. Шу боис, бу ёндашув доимий эмас, балки шароитга қараб қўлланилиши керак, дея таъкидланмоқда.