Ўзбекистонда мактабгача таълим 7 йилда туб ўзгаришга юз тутди
Мактабгача таълимда қамров 3 баробар, ташкилотлар сони 7 баробар ошди.
Ўзбекистон Республикаси Вазирлар Маҳкамаси ҳузуридаги Макроиқтисодий ва ҳудудий тадқиқотлар институти (МҲТИ) мутахассислари томонидан 2017–2024 йиллар оралиғида мактабгача таълим тизимида амалга оширилган ўзгаришлар чуқур таҳлил қилинди.
Таҳлил натижаларига кўра, ушбу даврда мактабгача таълим ташкилотлари сони 7 баробар ошиб, 2024 йил охирига келиб 38 058 тага етган. 2017 йилда бу кўрсаткич атиги 5 186 тани ташкил этган эди.
Шу билан бирга, муассасалардаги ўринлар сони 3,3 баробарга ошиб, 2,4 миллион болани қамраб олиш имконияти яратилган. 3–6 ёшдаги болаларни мактабгача таълим билан қамраб олиш даражаси эса 25,4 фоиздан 76 фоизгача кўтарилиб, қарийб 3 баробар ошган.
Педагог ходимлар сони ҳам сезиларли даражада ортиб, 175 минг нафарга етган. Ҳар бир педагогга ўртача 13,4 нафар бола тўғри келмоқда. Бу эса педагогик таъминотда сифат ва барқарорликни таъминлашга хизмат қилмоқда.
2020 йилда "Finance Inquirer" нашрининг ЮНИСEФ, Жаҳон банки ва RGCA (Research Group Central Asia) маълумотларига асосланган рейтингида Ўзбекистон болаларни мактабгача таълим билан қамраб олиш бўйича дунёдаги энг яхши ўсиш суръатини намоён қилган 10 мамлакатдан бири сифатида биринчи ўринни эгаллади.
2023 йил 9 октябрдан бошлаб мамлакат бўйлаб илк бор MELQO халқаро баҳолаш тизими асосида мактабгача таълим сифати баҳоланди. Баҳолаш натижаларига кўра:
болаларнинг эрта математика кўникмалари — 94 фоиз,
эрта саводхонлик кўникмалари — 77 фоиздан юқори,
баҳолашда иштирок этган ташкилотларнинг 90 фоизи ўқув-методик адабиётлар билан тўлиқ таъминланган.
Шу билан бирга, Жаҳон банки кўмагида бошланган “Болаларни эрта ривожлантириш тизимини такомиллаштириш” лойиҳаси доирасида 9 та ҳудудда 30 та мобил автобус орқали 142 та кўчма гуруҳ ташкил қилинди ва 2 528 та янги ўрин яратилди. Бу имконияти чекланган ҳудудлардаги болаларнинг таълимга тенг киришини таъминлашга хизмат қилмоқда.
“Ўзбекистон – 2030” стратегиясида эса қуйидаги муҳим вазифалар белгиланган:
барча болаларни мактабгача таълим билан тўлиқ қамраб олиш;
компьютер синфларини жорий қилиш орқали бошланғич рақамли саводхонликни шакллантириш;
барча мактабгача таълим муассасаларини тоза ичимлик суви ва замонавий гигиена инфратузилмаси билан таъминлаш.
