Бухорода ўқувчининг отаси унинг синфдошларини калтаклади
Ҳолат юзасидан вилоят ММТБ маълумот берди.
Ижтимоий тармоқларда Бухоро шаҳридаги 34-умумтаълим мактабида 4-синф ўқувчиларидан бирининг отаси синф хонасига кириб, болаларни калтаклагани ва бу ҳолатга синф раҳбар томошабин бўлиб қараб турганлиги акс этган видеолавҳа тарқалди. Ҳолат юзасидан Мактабгача ва мактаб таълим бошқармаси расмий муносабат билдирди.
Қайд этилишича, видеолавҳада акс этган ҳолат жорий йилнинг 30 апрель куни содир бўлган. Шу куни синф ўқувчилари кўчада ўзаро жанжаллашиб қолишади ва болалардан бири ўртоғининг отасига қўнғироқ қилиб, унинг ўғлини уришганини айтади. Ота шу заҳоти синф хонасига келиб, ўғлини урган болаларни бошқаларнинг олдида калтаклаб кетади.
Мактаб раҳбарияти томонидан отанинг ноқонуний хатти-ҳаракати бўйича тегишли ҳуқуқ-тартибот идораларига расмий мурожаат қилинган. Шу билан бирга бегона шахсни мактабга бемалол киришига йўл қўйган мактаб қоровули Ш.А билан тузилган меҳнат шартномаси бекор қилинган.
Ўз хизмат вазифасига нисбатан масъулиятсизлик билан ёндашган ҳамда юзага келган ҳолатни назоратсиз қолдирган мактаб директори билан тузилган меҳнат шартномаси бекор қилинган.
Синф раҳбари ва мактаб директорининг тегишли ўринбосарлари фаолиятини ўрганиш мақсадида айни пайтда хизмат текшируви амалга оширилмоқда.
