Иқлим ўзгариши яна рекорд даражада қайд этилди

 

Ер сайёрасида глобал ҳарорат рекордлари янгиланишда давом этмоқда. Европа иқлим мониторинги хизмати – Copernicus томонидан эълон қилинган сўнгги маълумотларга кўра, 2025 йил май ойи кузатувлар тарихидаги иккинчи энг иссиқ май бўлиб қайд этилди. Бу ойда Ернинг ўртача ҳарорати саноат инқилобидан олдинги даврга нисбатан 1,4°С га юқори бўлган.

 

Мутахассислар бу хавотирли тенденция ортиб бораётганидан огоҳлантирмоқда. 2025 йилнинг олдинги ойларида ҳам ўта иссиқ ҳароратлар кузатилган: апрель – кузатувлар тарихидаги иккинчи энг иссиқ апрель бўлди, март эса умуман рекорд янгиланган.

 

Copernicus хизмати директори Карло Буонтемпонинг таъкидлашича, ҳароратнинг 1,5°С критик чегарага яқинлашган вақти узайиб бормоқда. У бу ҳолат ҳозирча вақтинчалик кўриниши мумкинлигини, аммо яқин келажакда яна ҳарорат рекордлари қайд этилиши эҳтимоли катта эканлигини билдирган.

 

Айниқса, Европанинг шимоли-ғарбий ҳудудларида вазият ташвишли тус олган. Баҳор мавсуми бу ерда ниҳоятда қуруқ кечган — айрим жойларда 1979 йилдан буён энг кам ёғингарчилик ва тупроқ намлиги кузатилган.

 

Глобал иқлим ўзгаришининг бундай жадалликда давом этиши инсониятни нафақат экологик, балки иқтисодий ва ижтимоий жиҳатдан ҳам жиддий оқибатлар билан юзлаштириши мумкин.