“Россия Ўзбекистон нотасини диққат билан ўрганиб чиқмоқда”
Мигрантларга куч ишлатилишига Захарова муносабат билдирди.
“Россия томони Ўзбекистон нотасидаги маълумотларни диққат билан кўриб чиқмоқда ва ўзбекистонлик ҳамкорларнинг тегишли сўрови ваколатли органларга етказилмоқда. Олинган обектив маълумотлар белгиланган тартибда Тошкентга юборилади”, деди Россия ТИВ расмий вакили Мария Захарова.
Аввалроқ Ўзбекистон ТИВ матбуот котиби Аҳрор Бурхонов Россияда ўзбекистонлик фуқароларни тинтув қилиш ва нотўғри муносабатда бўлаётганидан хавотирда экани, шу муносабат билан Ўзбекистоннинг Москвадаги элчихонаси Россия Ташқи ишлар вазирлигига тушунтириш беришни сўраб нота юборгани ҳақида хабар берган эди.
“Ўзбекистон элчихонасидан нота олингани муносабати билан биз ундаги маълумотларни синчиклаб ўрганмоқдамиз. Шуни таъкидлашни истардимки, бизда ҳуқуқ-тартибот ва бошқа хизматлар орқали тўғридан-тўғри алоқа каналлари мавжуд. Иттифоқчилар ўртасидаги анъанага кўра, суҳбат самимий бўлиб, ҳар қандай сигнал синчковлик билан кўриб чиқилади. Ўзбекистон томонининг юқорида қайд этилган сўрови бўйича олинган маълумотлар ваколатли органларга етказилади”, деди Захарова.
