Тошкентда халқаро суриштирув журналистикаси тренинги бўлиб ўтди
Ўзбекистон ва Латвия журналистлари коррупцияга қарши курашда тажриба алмашишди.
2025 йил 9 июнь куни Коррупцияга қарши курашиш агентлигида муҳим бир халқаро тренинг бўлиб ўтди. Тадбир суриштирув журналистикаси мавзусига бағишланиб, унда Латвия ва Ўзбекистон журналистлари, медиа экспертлари иштирок этди.
Тадбир “Болтиқ ОАВни ривожлантириш маркази” (Латвия) томонидан ташкил этилган бўлиб, унинг асосий мақсади журналистларнинг суриштирув методологияси, ахлоқий ёндашувлар ва фактларни текшириш бўйича билим ва кўникмаларини мустаҳкамлашдан иборат эди.
Тренингнинг очилишида Гунта Слога, Болтиқ ОАВни ривожлантириш маркази ижрочи директори ва Мартинс Мурниекс, лойиҳа эксперти сўзга чиқди.
Тадбир давомида қуйидаги мавзулар муҳокама қилинди:
Суриштирув журналистикасининг тамойиллари ва методологияси, масъулиятли ёндашув ва қонунчилик, фактларни текшириш, маълумотлар базалари билан ишлаш, контентни самарали тузиш ва уни аудиторияга етказиш стратегиялари.
Тренингда Лола Исламова (Ўзбекистон) ва Инга Спринге (Латвия) каби етук журналистлар ўз маърузалари ва тажрибалари билан иштирокчиларга илҳом бағишлади.
Айниқса, аудиторияни максимал даражада қамраб олиш, ҳикояларни аниқлаш ва уларни турли платформаларга мослаштириш бўйича берган тавсиялари алоҳида эътиборга сазовор бўлди.
Иштирокчилар нафақат тингловчи, балки фаол қатнашчи сифатида гуруҳларда ишлади, турли амалий машғулотлар бажарди, савол-жавоблар орқали мавзуларни чуқурроқ ўзлаштирди.
