Туркияда аёл ўсимлик чойи сабабли комага тушди

Туркиянинг Аксарай шаҳрида яшовчи 24 ёшли Бушра исмли аёл озиш мақсадида ўсимлик чойларидан мунтазам фойдаланиб, жигар етишмовчилигига учраган ва комага тушган.

 

Маълумотларга кўра, Бушра баъзан кунига тўрт пиёлагача ўсимлик чойи ичган, шу билан бирга оғриқ қолдирувчи дориларни ҳам қабул қилган. Орадан бироз вақт ўтгач, унинг соғлиғи ёмонлаша бошлаган: қўлларида қизил доғлар, бўғим оғриқлари, ҳушдан кетиш ҳолатлари пайдо бўлган.

 

Дастлаб Аксарайда унга тез тиббий ёрдам кўрсатилган, аммо ҳолати оғирлашгани сабабли у Анталия Таълим ва тадқиқот шифохонасининг трансплантация марказига олиб ўтилган. Бошида жигар ферментлари юқори кўрсаткич бермаган бўлсада, сариқлик даражаси кескин ошгани аниқланган.

 

Мос донор йўқлиги сабабли у фавқулодда донор кутиш рўйхатига киритилган. Тахминан 24 соат ичида мос донор топилган ва унга зудлик билан жигар кўчириб ўтказиш операцияси амалга оширилган. Реанимациядан сўнг Бушранинг аҳволи барқарорлашган ва у операциядан уч ҳафта ўтиб уйига чиқарилган.

 

Бушра бу воқеадан сўнг журналистларга шундай деди: “Озиш учун кўк чой, жўка чойи ичардим. Кунига тўрт мартагача ҳам ичган вақтларим бўлган. Буларни бозордан тайёр пакет ҳолида сотиб олардим. Одамлар ҳамон бу маҳсулотларни ишлатишади. Мен бу чойлардан ёмон натижа кўрдим. Энди ҳеч кимга шифокор маслаҳатига амал қилмасдан бу маҳсулотларни ишлатишни тавсия этмайман”.

 

Туркиялик шифокор ва профессор Ариф Асланер ушбу ҳолатга жиддий эътибор қаратиш лозимлигини таъкидлади: “Бемор озишни истаб, ижтимоий тармоқларда машҳур бўлган ъдиетологларʼ маслаҳатига амал қилган. Оддий кўринган ўсимлик чойи ва қўшимчалар аслида жигар фаолиятини издан чиқарган. Ҳар қандай ўсимлик маҳсулотини ишлатишдан аввал мутахассисга мурожаат қилиш шарт”.