Хитойлик эркак иш ва оиласидан воз кечиб, ғорда яшамоқда
У одатий турмуш тарзини “маъносиз” деб атаган.
Хитойлик 35 ёшли Минг Ҳенгсаи ҳаётдаги босимлар, қарзлар ва иш стрессидан чарчаб, ғорга кўчиб яшашга қарор қилди. У илгари такси ҳайдовчиси бўлиб ишлаган ва кунига 10 соатдан ишлаб, ойига ўртача 1400 доллар ишлаб топган.
Ҳенгсаи оила аъзоларига қарздор бўлгани учун тинимсиз ишлашга мажбур бўлган, аммо қарзларини тўлай олмаган. Натижада қариндошлари унинг мол-мулкини сотиб юборишган. 2021 йилда у бу турмуш тарзини “маъносиз” деб атаб, она шаҳри Сичуанга қайтган ва бир ғорни 6000 долларга уйга айлантирган.
Ҳозирда Ҳенгсаи китоб ўқиш, сайр қилиш ва боғдорчилик билан шуғулланади. У ўзи етиштирган сабзавотлар билан озиқланади ҳамда 40 минг обуначига эга бўлган блог юритади. У иш ва никоҳни “вақт ва пулни беҳуда сарфлаш” деб ҳисоблайди ва доимо шундай тинч ҳаёт ҳақида орзу қилганини айтади.
