Кўзи ожизлар учун AI навигатор яратилди
Янги навигатор кўриш ногиронлиги борлар учун мустақил ҳаракатланишни осонлаштиради.
Россиянинг Новосибирск давлат техника университети (НСТУ) олимлари кўзи ожиз ва заиф кўрувчи инсонларга ёрдам берадиган инновацион сунъий интеллектли навигатор ишлаб чиқди. Бу тизим инсонларга атроф-муҳитдаги тўсиқларни аниқлаш ва хавфсиз ҳаракатланишда кўмаклашади.
Янги қурилманинг асосий афзаллиги – офлайн режимда ишлашидир. Яъни, фойдаланувчига фақат оддий телефон кифоя қилади: иловани юклаб олиш, камерани ёқиш ва телефонни кўкрак соҳасига маҳкамлаш керак бўлади. Шундан сўнг, нейрон тармоқ реал вақт режимида камера орқали келаётган тасвирларни таҳлил қилиб, фойдаланувчини атрофдаги хавфли объектлар ҳақида овозли хабарнома орқали огоҳлантиради.
Лойиҳа муаллифи Егор Авдеэв тушунтирганидек, тизим ҳар бир кадрни 300 миллисекундда таҳлил қилади ва фойдаланувчини ортиқча маълумот билан чарчатмасдан, айнан 5 метр радиусдаги муҳим тўсиқлар ҳақида огоҳлантиради. Бунга машиналар, эшиклар ёки бошқа ҳаракатга халақит берувчи объектлар киради.
Сунъий интеллект конволюцион нейрон тармоқ асосида яратилган бўлиб, уни ишлаб чиқувчилар махсус белгиланган маълумотлар тўплами асосида ўқитишган. Бу қурилма хорижий альтернативлардан фарқли ўлароқ:
- Интернет алоқасисиз ишлайди (офлайн режим)
- Рекламасиз ва пуллик обуна талаб қилмайди,
- Оддий смартфон ёрдамида фойдаланиш мумкин.
Лойиҳани ишлаб чиқувчилар келгусида тизимга белгиларни таниш (ОСР) функцияси ва хариталаш сервисларини интеграция қилиш орқали оптимал йўналишларни қуриш имкониятини қўшишни режалаштиришмоқда.
Прототипнинг реал шаҳар муҳитида кўзи ожиз кўнгиллилар иштирокида ўтказилган синовлари янги навигаторнинг амалий самарадорлигини исботлади.
