Эрон парламенти Ҳурмуз бўғозини ёпишни мақуллади
Якуний қарорни Эроннинг Миллий хавфсизлик кенгаши қабул қилади.
Эрон парламенти Ҳурмуз бўғозини ёпиш зарур деган қарорга келди. Бу ҳақда парламентнинг миллий хавфсизлик ва ташқи сиёсат бўйича комиссияси аъзоси Исмоил Коусари маълум қилди. Унга кўра, якуний қарорни Эроннинг Миллий хавфсизлик кенгаши қабул қилади.
"Ҳурмуз бўғозини ёпиш масаласи стратегик жавоб чораси сифатида кўрилмоқда", — деди Коусари. Унинг таъкидлашича, бу қарор Ғарб босимларига нисбатан жавоб бўлиши мумкин.
Ҳурмуз бўғози Форс кўрфазини Уммон кўрфази орқали Ҳинд океани билан боғлайди. Бу бўғоз дунёдаги энг муҳим нефть ва суюлтирилган газ ташиш йўлларидан бири ҳисобланади.
Бўғознинг энг тор қисми фақат 54 километр бўлиб, Эрон ва Уммон ўртасида жойлашган. Шу сабабли у минтақавий хавфсизлик ва глобал энергия бозорларида муҳим роль ўйнайди.
