Ўзбекистон Хитойдан 500 миллион доллар қарз олди
Мазкур маблағ телекоммуникация соҳасидаги лойиҳаларни молиялаштиришга йўналтирилади.
Ўзбекистон Хитой Экспорт-Импорт банки билан 500 миллион АҚШ доллари миқдорида қарз шартномасини имзолади. Ушбу маблағ мамлакатнинг стратегик лойиҳаларини амалга ошириш ва иқтисодиётни ривожлантиришда муҳим роль ўйнаши кутилмоқда.
Шартнома 21 июнь куни Инвестициялар, саноат ва савдо вазири Лазиз Қудратов ҳамда банк раиси Чен Хуайю ўртасидаги учрашувда имзоланди. Мазкур маблағ телекоммуникация соҳасидаги лойиҳаларни молиялаштиришга йўналтирилади.
Вазирликка кўра, 2002 йилдан бери Хитой Эксимбанки билан 3,2 миллиард долларлик 51 лойиҳа амалга оширилган. Ҳозирда 1,9 миллиард долларлик 2 лойиҳа бажарилмоқда, яна 2,2 миллиард долларга тенг 13 лойиҳа кўриб чиқилмоқда.
Лазиз Қудратов мазкур ҳамкорликни юқори баҳолаб, IT соҳасидаги лойиҳалар тез ва самарали амалга оширилишига ишонч билдирди.
