Ўзбекистонда ягона маош тизими жорий этилади
2026 йилдан давлат хизматчилари учун ягона иш ҳақи тизими яратилади.
2026 йил 1 январдан бошлаб Ўзбекистондаги барча давлат органлари ходимлари учун ягона иш ҳақи тизими татбиқ этилади. Бу ҳақда Президентнинг ПФ–95-сонли Фармони асосида маълум қилинди.
Янги тартибга кўра, бир хил малака ва лавозимда ишлайдиган давлат хизматчилари, уларнинг қайси идорада фаолият юритаётганидан қатъи назар, бир хил ойлик маош олади. Масалан, икки хил вазирликда фаолият юритаётган, мутахассислиги ва тажрибаси тенг бўлган ходимларга эндиликда тенг миқдорда иш ҳақи белгиланади.
Ушбу тизим:
- давлат ташкилотлари ўртасидаги иш ҳақи номутаносиблигини бартараф этиш;
- кадрлар оқимини камайтириш;
- давлат хизматининг барқарорлигини таъминлаш;
- ва соҳага адолатли, рақобатбардош меҳнат муҳитини яратиш мақсадида жорий этилмоқда.
Ягона маош тизимини жорий қилиш механизми ва аниқ ҳисоб-китоблар 2025 йил 1 ноябргача ишлаб чиқилиб, Президентга тақдим этилиши белгиланган.
Мутахассислар бу ёндашув давлат хизматини янада жозибадор қилиши, кадрлар сифатини ошириши ва иш ҳақи бўйича адолатли тизимни шакллантириши мумкинлигини таъкидламоқда.
