Сирдарёда каналдан 59 ёшли фуқаронинг жасади топилди
Сайхунободдаги канал фожиаси бўйича суриштирув ишлари олиб борилмоқда.
2025 йил 21 июнь куни соат 11:46 да Сирдарё вилояти, Сайхунобод тумани ҳудудида фожеали ҳодиса юз берди. Туман Ички ишлар бўлимидан ФВВга келиб тушган маълумотга кўра, бир нафар фуқаронинг танаси сув юзасида кўрилгани ҳақида хабар берилган.
Зудлик билан воқеа жойига етиб борган қутқарувчилар Сайхунобод туманининг “Бахмалсай” маҳалла фуқаролар йиғини ҳудудидан оқиб ўтувчи туманлараро ўнг тармоқ каналининг 266-пикет қисмида 1966 йилда туғилган эркак кишининг жасадини сувдан олиб чиқишди.
Ҳозирда ҳодиса юзасидан тегишли ҳуқуқ-тартибот органлари томонидан суриштирув ишлари олиб борилмоқда. Расмий хулосалар ва қўшимча маълумотлар кейинчалик эълон қилинади.
