Тошкентда таниқли блогер ўз уйида Нил тимсоҳини сақлаб келаётганлиги аниқланди
Тимсоҳ Тошкент ҳайвонот боғига топширилди, ҳуқуқбузарга эса чора кўрилди.
Ижтимоий тармоқларда фуқаронинг ўз уйида Нил тимсоҳини сақлаётганлиги ҳақидаги видеоёзувлар тарқалгач, Экология, атроф-муҳитни муҳофаза қилиш ва иқлим ўзгариши вазирлиги мутасаддилари зудлик билан ҳолатни ўрганишга киришди.
Тезкор рейд давомида Тошкент шаҳрида истиқомат қилувчи фуқаронинг яшаш манзилидан бир бош Нил тимсоҳи аниқланиб, мусодара қилинди. Мазкур ёввойи ҳайвон Тошкент ҳайвонот боғига топширилди. Бу ҳақда Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги хабар берди.
Маълумот ўрнида айтиш жоизки, Вазирлар Маҳкамасининг 736-сон қарорига мувофиқ, 2025 йил 1 январдан бошлаб ёввойи ҳайвонларни (рўйхат асосида) жисмоний шахслар томонидан уй шароитида сақлаш ҳамда уларни цирк томошаларида ишлатиш қатъиян тақиқланади.
Ҳуқуқбузар билан Маъмурий жавобгарлик тўғрисидаги кодекснинг 92 прим 1-моддаси 1-қисми асосида баённома расмийлаштирилди. Иш ҳужжатлари ҳуқуқий баҳо бериш ва чора кўриш учун суд органларига юборилган.
Экологик назорат тадбирлари республиканинг барча ҳудудларида давом эттирилмоқда.
