Энди рухсатсиз диний таълим берганлар 3 йилгача озодликдан маҳрум этилади
Сенат ноқонуний диний таълимни чекловчи қонунни қабул қилди.
Сенат томонидан вояга етмаганларга рухсатсиз диний таълим берганлик учун жиноий жавобгарлик жорий этилишини кўзда тутувчи қонун лойиҳаси маъқулланди. Ушбу қонун Ўзбекистон Республикасининг Жиноят кодексига тегишли ўзгартиришлар киритишни назарда тутади.
Бу ҳақда Ўзбекистон Республикаси Олий Мажлиси Сенати матбуот хизмати хабар берди. Унга кўра, Жиноят кодексининг 229-2-моддасига янги бандлар киритилиб, диний ташкилот бошқаруви ёки марказий органининг розилигисиз, шунингдек махсус диний маълумотга эга бўлмаган шахсларнинг вояга етмаганларга диний таълим бериши қонун билан тақиқланмоқда.
Қонунга кўра, бундай ҳаракатлар қуйидагича жазоланади:
- 50 баравардан 100 бараваргача БҲМ миқдорида жарима;
- 360 соатгача мажбурий жамоат ишлари;
- 3 йилгача ахлоқ тузатиш ишлари ёки озодликни чеклаш;
- 1 йилдан 3 йилгача озодликдан маҳрум қилиш жазоси.
Сенаторлар бу қонун ёшларнинг руҳий ва ижтимоий ҳимоясини кучайтириш, диний таълимни тартибга солиш ҳамда экстремизмнинг олдини олишга хизмат қилишини қайд этди.
Қонун эндиликда президент томонидан имзоланиши учун тақдим этилган. Имзолангач, у қонуний кучга киради.
