Эрон фуқаролари учун Ўзбекистонга визасиз кириш режими муҳокама қилинмоқда

 

Эрон фуқароларининг Ўзбекистонга визасиз кириши масаласи кўриб чиқилмоқда. Бу ҳақда Эроннинг Ўзбекистондаги элчихонаси вакили маълум қилди.

 

Унга кўра, айни пайтда Ўзбекистон фуқаролари Эронга йилига икки марта, ҳар сафар икки ҳафтадан визасиз саёҳат қилиши мумкин. Мазкур тартиб жорий этилгач, Эронга бораётган ўзбекистонликлар сони кескин ошгани айтилмоқда. Жумладан, Теҳрон–Тошкент йўналишидаги авиачипта сотувида юқори талаб кузатилмоқда — ҳафтасига икки марта парвоз амалга оширилаётган бўлсада, чипта топиш қийинлашган.

 

Элчихонанинг муваққат ишлар вакили Ҳусайн Парвареш маълумотига кўра, бу бориш-келишлар фақат туризм эмас, балки тадбиркорлик соҳасида ҳам фаоллашган.

 

Шунингдек, тиббий туризм йўналишидаги ҳамкорлик масалалари ҳам муҳокама қилинмоқда. Ўзбекистонлик беморлар учун Эрондаги клиникаларда даволаниш имкониятларини кенгайтириш устида иш олиб борилмоқда.

 

Эрон томони Ўзбекистон фуқаролари учун визасиз тартибни бир томонлама жорий этган бўлса, ҳозирда икки томонлама асосда — Эрон фуқаролари учун ҳам Ўзбекистонга визасиз кириш имкониятини яратиш бўйича музокаралар давом этмоқда. Бу борада Ўзбекистон Ташқи ишлар вазирлиги ва бошқа масъул тузилмалар билан маслаҳатлашувлар олиб борилаётгани айтилди.

 

Маълумот учун, 2019 йилдан бошлаб Эрон фуқаролари Ўзбекистонга электрон виза асосида кириш имконига эга бўлган.