Мўғулистонда илк бор “Ўзбекистон маданияти кунлари” бўлиб ўтмоқда

23 июнь куни Мўғулистон пойтахтида илк маротаба “Ўзбекистон маданияти кунлари” тантанали тарзда бошланди. Тадбир доирасида Ўзбекистон тарихий-маданий меросини акс эттирувчи кўргазма ташкил этилди ҳамда Мўғулистон Миллий опера ва балет театрида гала-концерт дастури намойиш этилди.

 

 

 

 

 

Кўргазмада иштирок этган меҳмонлар Ўзбекистон ва Мўғулистонни бой тарих, умумий қадриятлар ва “Буюк Ипак йўли” мероси бирлаштираётганини таъкидладилар. Ўзбекистон маданият вазири Озодбек Назарбеков ўз нутқида: “Маданият кунлари халқларимиз ўртасидаги ўзаро тушунишни чуқурлаштириш ва тарихий дўстликни мустаҳкамлаш йўлида муҳим қадамдир”, — деди.

 

 

 

 

 

Шунингдек, Озодбек Назарбеков ва Мўғулистоннинг маданият, спорт, туризм ва ёшлар вазири Ундрам Чинбат ўртасида ҳамкорлик учрашуви бўлиб ўтди. Унда санъат ва таълим соҳаларидаги алоқаларни кенгайтириш масалалари муҳокама қилинди. Вазир Назарбеков мўғулистонлик санъаткорларнинг Ўзбекистонда таҳсил олганини эслаб, Алишер Навоий номидаги театрнинг бу борадаги ролини алоҳида эътироф этди.

 

Тадбир 25 июнгача давом этади. Эслатиб ўтамиз, 2024 йил июнь ойида Тошкентда ҳам Ўзбекистон ва Мўғулистон санъаткорларининг қўшма концерти бўлиб ўтган эди.