Алимент тўловларининг энг минимал миқдори оширилмоқда
Бугунги кунда алиментнинг энг кам миқдори 306 минг сўмни ташкил этмоқда, бу эса минимал истеъмол харажатларининг (669 минг сўм) ярмидан ҳам кам.
Олий Мажлис Сенати аъзолари Ўзбекистонда алимент тўловларининг энг кам миқдорини қайта кўриб чиқиш зарурлигини таъкидладилар. Бугунги кунда алиментнинг энг кам миқдори 306 минг сўмни ташкил этмоқда, бу эса минимал истеъмол харажатларининг (669 минг сўм) ярмидан ҳам кам экани қайд этилди.
Сенаторлар мазкур ҳолатни боланинг яшаши ва ривожланиши учун етарли бўлмаган молиявий таъминот деб баҳолаб, алимент миқдорини бола ёшидан келиб чиққан ҳолда адекват даражада белгилаш зарурлигини билдиришди.
Шу муносабат билан парламент томонидан Вазирлар Маҳкамасига алиментнинг энг кам миқдорини қайта белгилаш ва уни болалар эҳтиёжларига мувофиқ равишда ошириш бўйича парламент сўрови юборилди.
Мазкур таклиф ижтимоий ҳимояга муҳтож оилалар, хусусан ёлғиз оналар ва алимент тўлайдиган шахслар манфаатларини мувозанатда ҳисобга олишни кўзда тутади.
