Кембриж олимлари ирсий касалликларга қарши сунъий ДНК яратмоқда
Бу сунъий ҳужайралар ёрдамида, зарарланган жигар ёки иммун тизими каби муҳим органлар соғлом тўқима билан тикланиши мумкин.
Буюк Британияда илк бор инсон ДНКсининг сунъий нусхасини яратишга қаратилган расмий илмий лойиҳа йўлга қўйилди. Лойиҳани дунёдаги энг йирик тиббий-биологик фондлардан бири — Wellcome Trust молиялаштирмоқда. Ташкилот ушбу мақсад учун 10 миллион фунт стерлинг ажратган.
Аввалроқ бундай лойиҳаларга рухсат берилмаган эди — сабаби, инсон геноми устида сунъий манипуляциялар “генетик дастурланган” одамлар пайдо бўлиши хавфи билан боғлиқ деб қаралган. Шунга қарамай, бугунги кунда лойиҳа расмий босқичга ўтди.
Тадқиқотчиларнинг таъкидлашича, лойиҳа гуманитар ва тиббий йўналишга эга бўлиб, оғир ирсий касалликларнинг олдини олиш ва даволаш имкониятларини кенгайтиришни мақсад қилади.
Лойиҳада иштирок этаётган Кембриж университети олими Жулиан Сейлнинг айтишича, мутахассислар касалликларга бардошли сунъий ҳужайралар яратиш устида ишламоқда. Бу ҳужайралар орқали, масалан, жигар ёки иммун тизими каби ҳаётий органлар зарарланганда уларни соғлом тўқималар билан алмаштириш мумкин бўлади.
Бу илмий ташаббус синтетик биология соҳасида Буюк Британиянинг етакчи ролини мустаҳкамлаши, шунингдек, келажакда регенератив тиббиётда инқилобий ўзгаришларга олиб келиши кутилмоқда.
