Тошкентда 2 тонналик “ажал” ёниб кулга айланди

26 июнь — Халқаро гиёҳвандликка курашиш куни муносабати билан Давлат хавфсизлик хизмати, давлат божхона қўмитаси ва ҳамкор ташкилотлар томонидан Интернатионал Ҳотел Ташкент меҳмонхонасида халқаро экспертлар, оммавий ахборот воситалари ходимлари иштирокида тадбир ташкил этилди.

 

 

Тадбир давомида дунёдаги нарковазият ҳақида маълумот берилиб, иштирокчиларнинг диққати рақамларга қаратилди. Унга кўра, ҳозирда дунёда қарийб 300 млн киши гиёҳвандлик воситаларини истеъмол қиляпти, қурбонлар сони эса бир йилда 600 минг кишидан ошмоқда.

 

Сўнгги 5 йилда Ўзбекистонда наркожиниятлар сони қарийб 2 бараварга, ноқонуний муомаладан олинган наркотиклар мусодараси 8,5 бараварга ошган бўлса, синтетик гиёҳвандлик воситалари мусодараси 80 бараварга кескин кўпайган.

 

Шунингдек, тадбирда ўтган бир йил мобайнида Ўзбекистон ҳудудида ҳуқуқни муҳофаза қилувчи органлар томонидан ноқонуний муомаладан мусодара қилинган гиёҳвандлик воситалари, психотроп моддалар, кучли таъсир қилувчи дори воситалариннинг йўқ қилиш жараёни онлайн тарзда намойиш этилди.

 

 

Тадбирда гиёҳвандлик воситаларига бўлган тобеликдан даволаниб чиққан ҳамда наркожиноят учун жазони ўтаб келган фуқароларга сўз берилди. Наркотиклар чангалидан қутулиб, янги ҳаётни бошлаган ушбу шахслар рамзий тугмани босиб, гиёҳванд моддаларни йўқ қилиш жараёнига старт берди.

 

Давлат хавфсизлик хизматининг маълум қилишича, ёқиш маросимида жами 2 тонна 135 кг 188 грамм наркотик йўқ қилинган.