Қидирувда бўлган 12 нафар шахс БААдан Ўзбекистонга экстрадиция қилинди
Улар турли жиноятларни содир этганликда гумон қилиниб, Интерпол орқали қидирувга берилган эди.
Халқаро қидирувда бўлган 12 нафар фуқаро Бирлашган Араб Амирликларидан (БАА) Ўзбекистонга олиб келинди. Бу ҳақда ИИВ матбуот хизмати хабар берди.
Маълум қилинишича, улар турли жиноятларни содир этганликда гумон қилиниб, Интерпол орқали қидирувга берилган эди. Уч нафар фуқаронинг топширилиши БАА томонидан расман тасдиқланди.
Мазкур иш Интерполнинг Ўзбекистон ва Абу-Дабидаги Миллий марказий бюролари ўртасидаги ҳамкорлик доирасида амалга оширилди. Учрашув давомида томонлар қидирувдаги жиноятчилар ва гумонланувчилар рўйхатини алмашди ҳамда 12 нафар фуқаронинг экстрадицияси бўйича келишувга эришди.
Бу Ўзбекистон ҳуқуқ-тартибот органларининг халқаро жиноятчиликка қарши курашда олиб бораётган фаол ишларининг навбатдаги намунаси бўлди.
Маълумот учун, 2021 йилда Санкт-Петербургда содир этилган қотиллик жинояти бўйича қидирувда бўлган ўзбекистонлик шахс ҳам яқинда Салвадордан экстрадиция қилинган эди. Шунингдек, Россияда 9 миллион долларлик талон-торожликда айбланган фуқаро 15 май куни Ўзбекистонга қайтарилди. Интерпол орқали қидирувда бўлган бир аёл эса БААдан чиқариб юборилган эди.
