Тошкентда 3 ёшли болани OLX’да сотувга қўйган шахс унинг акаси бўлиб чиқди
Ака шўхлиги сабаб укасининг “таъзирини" бериб қўймоқчи бўлган.
Ижтимоий тармоқларда 3 ёшли бола OLX савдо платформасида сотувга қўйилгани ҳақидаги эълон катта шов-шувга сабаб бўлди. Ҳолат юзасидан болалар омбудсмани изоҳ берди.
Тезкор-қидирув ишлари натижасида эълон Тошкент шаҳри, Учтепа туманида яшовчи 13 ёшли бола томонидан жойлаштирилгани аниқланди. У 3 ёшли укасини шўхлиги учун “таъзирини бериш” мақсадида OLX'да 150 минг сўм нархда сотувга қўйган.
Болалар омбудсмани бу ҳаракатни “болаларча ўйловсиз қадам” сифатида баҳолади. Унга кўра, бола бу ишнинг жиддий оқибатларини тушунмаган.
Ҳозирда Учтепа туман ИИБ томонидан терговга қадар суриштирув ишлари олиб борилмоқда. Болалар омбудсмани ҳолат юзасидан мониторингни давом эттирмоқда.
Мутахассислар бундай ҳолатлар болалар билан ишлашда рақамли саводхонлик ва интернет маданиятини ўргатиш муҳимлигини яна бир бор кўрсатганини таъкидламоқда.
