Андижонда жиҳодчиларнинг яширин жамоати фош бўлди
Улар келгусида террорчилик ташкилотига қўшилишни ният қилишган.
Андижонда ҳуқуқни муҳофаза қилувчи органлар томонидан олиб борилган тадбирлар давомида жиҳодчилар диний экстремистик оқимининг яширин жамоати фаолияти аниқланди. Бу ҳақида вилоят ИИБ ахборот хизмати хабар бермоқда.
Қайд этилишича, жамоат етакчиси — Андижон шаҳрида яшовчи 1981 йилда туғилган У.A. ўз атрофига 12 нафар шахсларни йиғиб, жамоат ташкил этган ҳолда турли чойхоналарда тўпланиб, келгусида Суриядаги “Тавҳид ва жиҳод катибаси” халқаро террорчилик ташкилотига қўшилишни ният қилишган. Шунингдек, ўзаро “Байтулмол” кўринишида пул маблағлари йиғиб, ўз тарафдорларига бериб келишган.
“Жамоат аъзоларининг хонадонларида ўтказилган тинтув тергов ҳаракатлари давомида турли диний экстремистик адабиётлар ва бошқа ашёвий далиллар олинди. Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, ҳозирда тергов ҳаракатлари олиб борилмоқда”, дейилади хабарда.
Аввалроқ Фарғона вилоятининг Қўқон шаҳрида Суриядаги террорчиларга пул жўнатиб, уларни молиявий жиҳатдан қўллаб-қувватлаётганлар ушланганди.
