Трамп Канада билан савдо музокараларини тўхтатди
Яқин 7 кун ичида АҚШ янги тариф ставкаларини эълон қилади.
АҚШ президенти Доналд Трамп жума куни Канада билан савдо музокараларини дарҳол тўхтатганини эълон қилди. У бу қарорни Канаданинг рақамли хизматларга солиқ (ДСТ) жорий қилгани билан изоҳлаб, бу солиқни “АҚШга очиқ ҳужум” деб атади. Бу ҳақда CNN хабар берди.
Трампнинг айтишича, Канада билан барча савдо музокаралари тугатилди ва яқин 7 кун ичида АҚШ янги тариф ставкаларини эълон қилади. Канада ҳукумати эса музокараларни давом эттириш ниятида эканини билдирди. Бош вазир Марк Карни: “Бу мураккаб музокаралар, биз канадаликлар манфаатини ҳимоя қилишда давом этамиз,” — деди.
ДСТ айниқса АҚШнинг йирик технологик компанияларига, жумладан Meta, Google, Apple ва Amazon’га салбий таъсир қилмоқда. Трамп маъмурияти Канадага нисбатан кенг қамровли тарифлар жорий этилиши мумкинлигини айтмоқда, бу эса жавоб чораларини келтириб чиқариши мумкин.
Канада ишбилармон доиралари ҳукуматни солиқни бекор қилишга чақирмоқда. Канада Савдо палатаси ва Бизнес кенгаши, АҚШ билан савдо алоқаларининг ёмонлашуви иқтисодий хавф туғдиришини айтиб, ДСТъни дарҳол бекор қилиш тарафдори эканини билдирди.
