Уй савдоси энди нақдсиз бўлади
Мулк олди-сотдиси бўйича янги тартиб жорий этилади.
Ўзбекистонда кўчмас мулк олди-сотдисини нақдсиз шаклга ўтказиш режалаштирилмоқда. Бу ҳақда 26 июнь куни бўлиб ўтган Сенат йиғилишида Солиқ қўмитаси раисининг биринчи ўринбосари Мубин Мирзаев маълум қилди. Унга кўра, янги тартиб яширин иқтисодиётга қарши тизимли курашда муҳим қадам бўлади.
Президент Шавкат Мирзаевнинг сўзларига кўра, президент қарори лойиҳаси ишлаб чиқилиб, унда нақдсиз тўловларни рағбатлантиришга алоҳида урғу берилган. Барча вазирлик ва идоралар билан мувофиқлаштирилган ҳужжат ҳозирда президент администрациясига тақдим этилган. Қарор кучга киргач, дастлаб кўчмас мулк савдоси нақдсиз ҳисоб-китоб асосида амалга оширилади.
Ҳозирда уй сотиш ва харид қилиш кўпинча нақд пул орқали амалга оширилади. Янги механизм бу жараённи банк айланмаси орқали расмийлаштиришни мақсад қилган. Шунингдек, савдо қоидаларига риоя қилиш ва қонунийликни мустаҳкамлаш ҳам режанинг асосий йўналишларидан бири саналади.
Сўнгги маълумотларга кўра, 2024 йилда Ўзбекистонда уй нархлари фундаментал қийматидан 17 фоизга юқори бўлган. Ўтган йили 329 мингта уй сотилган бўлсада, бу 2023 йилга нисбатан 2,2 фоизга кам. Пасайишга ипотека чекловлари ва нархларнинг қисман реаллашуви сабаб бўлган.
