Мумбайда 3 йил давомида уйдан чиқмаган эркак ахлатлар орасидан топилди

Ҳиндистоннинг Мумбай шаҳрида 3 йил давомида ижтимоий ҳаётдан бутунлай чекиниб, уйи ичида яшаб келган эркак ахлат ва чиқиндилар орасида топилди. Бу ҳақда The Indian Express нашри хабар берди.

 

Маълумотларга кўра, 55 ёшли собиқ дастурчи Анук Кумар Наир чуқур депрессияга тушиб, яқинларининг вафотидан сўнг жамиятдан ажралган ва ижтимоий алоқаларни тўлиқ узган. Йиллар давомида ёлғизликда яшаган эркакни SEAL (Social and Evangelical Association for Love) номли хайрия ташкилоти ижтимоий ходимлари аниқлаган.

 

Наир яшайотган хонадон ташриф чоғида ахлат, озиқ-овқат қолдиқлари, синган мебеллар ва бошқа чиқиндилар билан тўлиб-тошгани аниқланган. У сўнгги уч йил давомида фақат онлайн буюртмалар орқали озиқ-овқат олган. Шунингдек, унинг оёғида жиддий инфекция аниқланиб, тез тиббий ёрдам кўрсатилган.

 

Айни пайтда у вақтинча хайрия ташкилотининг бошпанасида яшамоқда. Унинг сўзларига кўра, дўстлари йўқ ва соғлиғи ёмон бўлгани учун янги иш топиш имконияти мавжуд эмас.

 

Наирнинг қўшниларидан бири шундай дейди:

“Биз бир неча бор унга ёрдам таклиф қилдик, уйи ичидаги ҳолатни тозалашга ҳам уриниб кўрдик. Шунингдек, ота-онасининг банк омонатини унинг шахсий ҳисобига ўтказишда кўмак бердик.”