Сурхондарёда сув босими ортиши натижасида йирик ҳажмли қувур ёрилди
Вилоят ҳокимлиги Сурхондарёдаги қувур ёрилиши юзасидан баёнот берди.
Ижтимоий тармоқларда Сурхондарё вилоятида йирик ҳажмли сув қувури ёрилиб кетгани, бунинг оқибатида аҳоли хонадонларига зарар етгани ҳақида хабарлар ва видеолар тарқалди. Вилоят ҳокимлиги ҳодиса юзасидан расмий баёнот берди.
Маълум қилинишича, ҳодиса 30-июн куни соат 12:50 лар атрофида Жарқўрғон туманида жойлашган “Боботоғ” насос станциясининг 1-коллектори 7-участкасида юзага келган. D-2850 мм диаметрили қувурда ёрилиш содир бўлган ва натижада юқори босим остидаги сув ташқарига отилиб чиққан.
Авария аниқлангач, зудлик билан дастлабки хавфсизлик чоралари кўрилган: 1-коллекторга уланган 3 та насос агрегати тезкорлик билан тўхтатилган. Шундан сўнг махсус бригадалар воқеа жойига етказилиб, таъмирлаш ишлари олиб борилган. Соат 21:00 га келиб таъмирлаш тўлиқ якунланган, 21:20 да эса насос агрегатлари яна ишга туширилган.
Ҳокимликнинг таъкидлашича, ҳодиса натижасида аҳоли хонадонларига ҳам, насос станцияси иншоотларига ҳам ҳеч қандай зарар етмаган. Айни пайтда барча агрегатлар одатдаги иш режимида фаолият юритмоқда.
