Ўзбекистонда мактаб – университет интеграцияси бўйича янги тизим жорий этилади
Ўқувчилар эндиликда 7-синфдан бошлаб университет билан ҳамкорликда ўқийди.
2025 йил 1 сентябрдан бошлаб Ўзбекистонда таълим тизимига “мактаб – техникум (лицей) – университет” тамойилига асосланган янги кадрлар тайёрлаш модели жорий этилади. Ушбу ёндашув орқали ўқувчилар узлуксиз, босқичма-босқич ва касбий йўналтирилган ҳолда таҳсил олишади.
Янги тизим доирасида таълим жараёнининг камида 25 фоизи хорижий профессорлар ва халқаро малака сертификатига эга бўлган мутахассислар иштирокида амалга оширилади. Бу ўқувчиларга халқаро стандартларга мос билим ва кўникмаларни шакллантириш имконини беради.
Тажриба тариқасида, 2025 йил 1 сентябрдан Тошкент шаҳрининг Юнусобод туманидаги 250- ва 273-сонли умумтаълим мактаблари танлаб олиниб, улар университетга бириктирилади. Университет мазкур мактабларда таҳсил олаётган 7–9-синф ўқувчилари учун ҳар ойда уларнинг қизиқишларига мувофиқ факультатив машғулотлар ташкил этади. Ушбу машғулотлар бевосита университет лабораторияларида ўтказилади.
Бундан ташқари, университет ўқувчиларнинг лабораторияларга мунтазам ва хавфсиз ташрифларини ташкил этиш учун масъул этиб белгиланади. Бу ёндашув таълим тизимида назария ва амалийотнинг уйғунлигини таъминлашга хизмат қилади.
