ЖССТ тамаки, алкоголь нархини 50 фоизга оширишга чақирди
50 фоизлик нарх ўсиши – 50 миллион ҳаётни сақлаб қолиши мумкин.
Жаҳон соғлиқни сақлаш ташкилоти (ЖССТ) барча мамлакатларни соғлиқ учун зарарли маҳсулотлар — тамаки, алкоголь ва шакарли ичимликлар нархини камида 50 фоизга оширишга чақирди. Бу чора сурункали касалликларнинг олдини олиш ҳамда жамоат саломатлигини мустаҳкамлаш мақсадида таклиф этилмоқда дейди oxu.az нашри.
ЖССТ баёнотида таъкидланишича, зарарли маҳсулотларга солиқ юкининг оширилиши нафақат юрак хасталиклари, диабет ва саратон каби юқумли бўлмаган касалликларнинг тарқалишини камайтиради, балки давлат бюджетларига қўшимча даромад келтиради.
Ташкилот ҳисоб-китобларига кўра, тамаки, спиртли ичимликлар ва ширин ичимликлар нархининг 50 фоизга кўтарилиши келгуси 50 йил давомида 50 миллионга яқин эрта ўлимнинг олдини олиши мумкин.
ЖССТнинг 2024 йилги маълумотларига кўра, бугунги кунда дунёдаги ҳар саккизинчи киши семизликдан азият чекмоқда. Бу кўрсаткич 1990 йилдан бери деярли икки бараварга ошган.
