“Qwizzserial” вируси Ўзбекистонда юз минглаб фойдаланувчига зарар етказди

 

Group-IB халқаро киберхавфсизлик компанияси Ўзбекистонда кенг тарқала бошлаган янги зарарли дастур – “Qwizzserial” вируси бўйича расмий тадқиқот эълон қилди. Қайд этилишича, ушбу вирус атиги бир неча ой ичида юз мингга яқин фойдаланувчига зарар етказган.

 

Зарарли дастур асосан Телеграм мессенжери орқали “Молиявий ёрдам”, “Президентдан совға” каби жозибадор сарлавҳалар остида апк-файл кўринишида тарқатилмоқда. Фойдаланувчи ушбу иловани ўз қурилмасига ўрнатгач, дастур СМС-хабарларни ўқиш ва қабул қилиш учун рухсат сўрайди, сўнг эса банк картаси маълумотларини киритишни талаб қилади.

 

Ушбу схема ижтимоий муҳандислик усулларига асосланган бўлиб, илова орқали фойдаланувчига “Аризангиз қабул қилинди, пул тез орада етиб келади” каби ёлғон хабарлар юборилади. Бироқ ҳақиқатда эса фойдаланувчиларнинг банк ҳисобларидан маблағлар ноқонуний равишда ечиб олинмоқда.

 

Group-IB мутахассисларининг маълумотига кўра, 2025 йил мартдан июнгача бўлган муддатда мазкур зарарли схема орқали камида 62 минг АҚШ доллари ўғирланган. Бу фақат битта кибергуруҳга тегишли кўрсаткич бўлиб, реал зарар бундан анча кўп бўлиши мумкин.

 

Ўзбекистонда аҳоли даромад даражасининг пастлиги, молиявий саводхонлик ва рақамли хавфсизлик бўйича хабардорликнинг етишмаслиги сабабли, бундай ёлғон таклифларга ишониш ҳолатлари кенг тарқалган.

 

Мутахассислар СМС орқали тасдиқлаш тизимидан воз кечиб, унинг ўрнига биометрик аутентификация, пуш-билдиришномалар ёки махсус аутентификация иловалари орқали код яратиш каби илғор хавфсизлик чораларини жорий этишни тавсия қилмоқда.

 

Шунингдек, фирибгарлик схемалари ҳақида мунтазам огоҳлантиришлар берилиши муҳим бўлсада, бу муаммонинг тўлиқ ҳал бўлишини кафолатламайди. Асосий эътибор хавфсизлик тизимларини кучайтириш ва аҳолининг кибер саводхонлигини оширишга қаратилиши лозим.